Þrettán hundruð manna jólahátíð fatlaðra fest á filmu

„Þetta er í 31. skiptið sem Jólahátíð fatlaðra er haldin en hún hefur aldrei verið stærri,“ segir gleðigjafinn André Bachmann sem stendur fyrir Jólahátíð fatlaðra á Hilton hótelinu í kvöld. Á hátíðinni koma fram margir af þekktustu listamönnum þjóðarinnar, meðal annars Páll Óskar, Eyþór Ingi, Magni, Laddi og Friðrik Dór. Hljómsveitin Hvar er Mjallhvít? sér um undirleik.

„Fyrst var Jólahátíðin haldin í Kassagerðinni en þá mættu kannski um áttatíu manns en nú erum við komin á Hilton hótelið og gerum ráð fyrir að um þrettán hundruð manns mæti,“ segir André. Fólk mætir ekki eingöngu af höfuðborgarsvæðinu heldur kemur fólk frá Akranesi, Reykjanesbæ og Selfossi svo dæmi séu tekin.

„Það hefur verið mikið álag á mér undanfarin ár við undirbúninginn en nú hef ég fengið aðstoðarmann, Bjarna Þór Sigurðsson, og það léttir rosalega, það er erfitt að vera einn í þessu.“

Í ár verður jólahátíðin tekin upp á hljóði og mynd í fyrsta skiptið og eru það nemar í Kvikmyndaskóla Íslands sem sjá um upptökur.

„Það tekur meira og minna allt árið að skipuleggja svona hátíð en það er alltaf jafn gaman og það eru margir aðilar sem leggja hönd á plóg. Ég hvet alla aðstandendur fatlaðra til að koma með á þessa skemmtilegu samkomu,“ bætir André við, en allir eru velkomnir á hátíðina sem hefst klukkan 20.00 í kvöld á Hilton hótelinu.