Hvar má besti vinurinn vera?

Á nýju vefsíðunni bestivinur.is er hægt að fá upplýsingar um öll hundasvæði landsins auk fróðleiks, skemmtilegra myndbanda, upplýsinga um námskeið og hvar finna megi hundagistingu.



"Síðastliðið sumar vorum við fjölskyldan á ferðalagi um landið og hundurinn okkar með í för. Þá lentum við iðulega í vandræðum með hvar við mættum sleppa honum lausum. Mörg bæjar- og sveitarfélög hafa opnað sérstök hundasvæði þar sem hundar mega vera lausir en við rákum okkur á að upplýsingar um þessi svæði liggja ekki á lausu,“ segir Geir Gígja sem heldur ásamt konu sinni, Jónínu Einarsdóttur, úti vefnum tjalda.is þar sem er að finna upplýsingar um tjaldsvæði á landinu. „Okkur datt í framhaldinu í hug búa til vefsíðu þar sem hægt væri að finna öll hundasvæði landsins,“ segir hann og þannig vaknaði hugmyndin að vefsíðunni bestivinur.is.  Geir segir fólk almennt ekki mjög upplýst um þau hundasvæði sem eru í boði. „Við búum í Hafnarfirði og þegar við höfum hitt hundaeigendur og sagt þeim frá hundasvæðinu hér í bænum vita fæstir af því.“



Geir segir ekki hafa verið hlaupið að því að útvega upplýsingar fyrir síðuna. „Ég margsendi pósta á sum sveitarfélögin en ég held að ég sé kominn með öll svæðin,“ segir hann og vonar að sveitarfélögin sjái sér hag í að láta hann vita þegar ný svæði bætast við. „Ég veit til þess að slík svæði eru í vinnslu á nokkrum stöðum á landinu.“

Á vefsíðunni bestivinur.is er að finna kort sem sýnir hundasvæði á öllu landinu. „Höfuðborgarsvæðið stendur ágætlega, líkt og Austurland og ákveðinn hluti af Norðurlandi, en á Vesturlandi og Vestfjörðum er ekki að finna nein slík svæði,“ upplýsir Geir sem telur síðuna ekki síst gagnast hundaeigendum á ferðalagi.

Fleiri upplýsingar er að finna á síðunni. „Við höfum safnað saman lista yfir hundaþjálfara og -námskeið, hvar finna má pössun fyrir hundinn, annars vegar hótelpössun og hins vegar heimapössun. Við setjum inn fréttir og skemmtileg myndbönd af hundum og verðum auk þess með sérfræðinga sem skrifa pistla,“ segir Geir og lofar lifandi og skemmtilegum vef.

Hundur fjölskyldunnar heitir Ronja og er af labradorkyni. Hún er fyrsti hundur þeirra og Geir segir þau læra eitthvað nýtt af henni á hverjum degi. „Hún er þriggja ára, getur gert mann gráhærðan á köflum og er yndisleg þess á milli,“ segir hann hlæjandi. „Maður lærði ekki almennilega þolinmæði fyrr en maður eignaðist hund,“ segir hann kíminn.nsolveig@365.is