Kraumslistinn 2013 tilkynntur

Kraumslistinn 2013 var kynntur í sjötta sinn í gær. Á Kraumslistanum í ár er að finna sjö framúrskarandi plötur frá metnaðarfullu tónlistarfólki.

„Það var ekki auðvelt verkefni að gera upp á milli allra þeirra góðu platna sem skipuðu Úrvalslistann og komu út á árinu enda enginn vafi á því að tónlistarárið 2013 var gott og mikill kraftur í íslensku tónlistarfólki,“ segir Jóhann Ágúst Jóhannsson, framkvæmdastjóri Kraums tónlistarsjóðs.

Tuttugu manns áttu sæti í dómnefnd Kraumslistans 2013 en það voru þau Andrea Jónsdóttir, Anna Andersen, Arnar Eggert Thoroddsen, Árni Matthíasson, formaður dómnefndar, Benedikt Reynisson, Bob Cluness, Egill Harðarson, Elísabet Indra Ragnarsdóttir, Guðni Tómasson, Haukur Viðar Alfreðsson, Helena Þrastardóttir, Helga Vala Helgadóttir, Helga Þórey Jónsdóttir, Höskuldur Daði Magnússon, María Lilja Þrastardóttir, Ólafur Halldór Ólafsson, Ragnheiður Eiríksdóttir, Trausti Júlíusson, Valdís Thor og Þórunn Edda Magnúsdóttir.

Plöturnar sjö sem sköruðu fram úr og skipa Kraumslistann eiga það sameiginlegt að vera frumlegar, spennandi og fjölbreyttar en Kraumur mun leggja sitt af mörkum á komandi ári við að kynna þessi verk fyrir erlendum fjölmiðlum og fólki sem starfar innan tónlistargeirans.

Plöturnar:

Cell7 – Cellf

Dj. flugvél og geimskip - Glamúr í geimnum

Grísalappalísa - Ali

Gunnar Andreas Kristinsson – Patterns

Just Another Snake Cult - Cupid Makes a Fool of Me

Mammút - Komdu til mín svarta systir

Sin Fang - Flowers

Sjóðurinn mun styðja við Kraumslistaplöturnar og jafnframt auka við möguleika listamannanna á bak við þær til að koma verkum sínum á framfæri erlendis með því að kaupa ákveðinn fjölda af plötunum og dreifa þeim til ýmissa starfsmanna tónlistarbransans erlendis.