"Barnaperri“ sem starfaði á frístundaheimili játaði sök

Rúmlega sextugur starfsmaður á frístundaheimili í Breiðholti kom fyrir dómara Héraðsdóms Reykjavíkur í morgun vegna ákæru ríkissaksóknar um vörslu barnakláms. Málið var þá þingfest. Maðurinn játaði sök og hefur málið verið dómtekið.

Maðurinn er ákærður fyrir kynferðisbrot með því að hafa haft um nokkurt skeið yfir 160 ljósmyndir og 5 hreyfimyndir, sem sýndu börn á kynferðislegan og klámfenginn hátt, en tölvubúnaðurinn með myndefninu var haldlagður sama dag og maðurinn varð fyrir fólskulegri árás tveggja manna.

Lögregla lagði upphaflega hald á tölvu mannsins í júlí í fyrra, eftir að tveir menn sem höfðu ráðist á hann tjáðu lögreglu að þeir hefðu gert það vegna þess að hann væri „barnaperri“.

Maðurinn var hins vegar ekki handtekinn fyrr en í desember. Hann hafði tekið sér veikindaleyfi vegna árásarinnar í millitíðinni en snúið aftur til starfa nokkrum dögum áður en hann var handtekinn.

Maðurinn hefur undanfarin ár starfað sem verkefnisstjóri á barnasviði frístundaheimilis fyrir börn og unglinga. Hann hefur verið í launuðu leyfi síðan málið kom upp.

Daniel Arciszewski og Snorri Sturluson fengu í september í fyrra þriggja og tveggja og hálfs árs fangelsisdóma fyrir að ráðast inn til mannsins á heimili hans í Breiðholti og ræna hann, auk nokkurra smávægilegri brota.

Tvímenningarnir bundu hann í stól, hótuðu honum líkamsmeiðingum og lífláti og neyddu hann til að millifæra á þá á fimmta hundrað þúsund. Þeir bundu hann á höndum með rafmagnssnúru ofan í baðkari, tróðu upp í hann tusku og límdu fyrir. Þeir héldu honum nauðugum í íbúðinni í sex klukkustundir og höfðu síðan ýmsar eigur hans á brott með sér.