Sveiflukóngur gefur út jólaplötu

„Ég er búinn að vera með þennan draum í höfðinu í nokkur ár,“ segir Geirmundur Valtýsson.

Tónlistarmaðurinn ástsæli gefur í næsta mánuði út sína fyrstu jólaplötu og nefnist hún Jólastjörnur Geirmundar Valtýssonar.

„Það eru eintómar jólastjörnur sem flytja lögin fyrir mig og með mér. Það er gífurlega margt fólk sem kemur nærri þessu,“ segir hann og nefnir til sögunnar Helgu Möller, Siggu Beinteins, Pál Rósinkranz, Ara Jónsson og Berglindi Björk. Einnig syngja afadætur Geirmundar, þær Anna Karen Hjartardóttir og Valdís Valbjörnsdóttir sem eru átta og þrettán ára, í tveimur lögum.

Lögin eru öll eftir Geirmund og tveir textar eru eftir hann. Um helmingur laganna er rólegur en á hinum er skagfirska sveiflan allsráðandi. Einvala lið tónlistarmanna aðstoðaði við upptökurnar, eða Magnús og Finnbogi Kjartanssynir, Gulli Briem og Vilhjálmur Guðjónsson.

Aðspurður segist Geirmundur vera mjög sáttur við útkomuna. „Þetta verður alveg alvöru. Ég held að þetta verði mjög góð plata.“

Útgáfutónleikar verða haldnir í Miðgarði í Skagafirði 8. desember og verður þar öllu tjaldað til, að sögn sveiflukóngsins.