Plastpokalaus Laugardagur

„Við viljum hjálpa til við að minnka útbreiðslu óniðurbrjótanlegra plastpoka með því að hafa plastpokalausa daga,“ segir talsmaður Plastpokalausa laugardagsins, Dísa Anderiman.

Ef litið er á Ísland eitt og sér, þá notum við í kringum fimmtíu milljón óendurvinnanlega plastpoka á hverju ári og segir Dísa þessa gerviefnanotkun bæði óþarfa og óábyrga gagnvart náttúrunni.

„Í fyrra hittumst við hópur kvenna þar sem við ræddum ýmis samfélagsmál. Við fórum að velta því fyrir okkur hvað við gætum gert til þess að bæta samfélagið okkar og vorum við allar sammála því að notkun plastpoka er vaxandi vandamál. Í stað þess að bíða eftir að stjórnvöld geri eitthvað róttækt í málinu, þá ákváðum við að kýla á þetta sjálfar.“



Aðspurð segir Dísa að þetta sé þeirra fyrsta verkefni og til að byrja með einblíni hópurinn á plastpokalausan laugardag. „Við viljum hvetja alla Íslendinga til þess að hætta að nota plastpoka á laugardögum og taka þannig þátt í átakinu með okkur, segir Dísa. Fólk er hvatt til þess að nota margnota taupoka eða svokallaða bio-poka sem eru lífrænir og umverfisvænir pokar og brotna fyrr niður í náttúrunni en hefðbundnir plastpokar.

„Bio-pokar eru úr náttúrulegum afurðum eins og maíssterkju og brotna niður á skömmum tíma í jarðgerðinni og skilja því ekki eftir sig leifar eins og plastpokinn gerir,“ segir hún.

„Við skorum á alla landsmenn að taka þátt í þessu mikilvæga verkefni með okkur, látum gott af okkur leiða og tökum þátt í að bæta umhverfi okkar,“ segir Dísa að lokum.

Notar taupoka

„Við notum margnota taupoka í Aftur, það hefur verið stefna okkar frá upphafi. Margir af fastakúnnum okkar koma með pokana sína til okkar aftur og aftur. Ég hef það fyrir stefnu að afþakka poka í verslunum ef ég hef tök á því að halda á vörunum. Flestir eru meðvitaðir um mikilvægi þess að nota umhverfisvæna poka,“ segir Bára Hólmgeirsdóttir, hönnuður og eigandi tískuverslunarinnar Aftur. Verslunin notar sérmerkta taupoka undir vörur sínar.