Rihanna til liðs við UNICEF

Poppprinsessan Rihanna hefur gengið í lið með UNICEF, Barnahjálp Sameinuðu þjóðanna, við að vekja athygli á neyðarástandinu á Filippseyjum og hversu mikilvægt það er að við gleymum ekki börnunum þar.

„Neyð endar í fréttafyrirsögnum en hjálparstarfið heldur áfram eftir að myndavélarnar eru farnar,“ segir Rihanna.

„Ég hef verið aðdáandi og stuðningsaðili UNICEF í gegnum árin og mér finnst það heiður að hjálpa þeim að bjarga börnum sem urðu fyrir barðinu á fellibylnum Haiyan. Rúmlega fimm milljónir barna á Filippseyjum þurfa okkar hjálp. UNICEF er til staðar fyrir þau í dag og um ókomna framtíð og það er ég líka,“ bætir söngkonan við. Hún gaf auk þess sjálf meira en tólf milljónir króna í neyðarsöfnun UNICEF í Bandaríkjunum fyrir Filippseyjar.

Til að styrkja söfnun UNICEF hér á landi er hægt að senda sms-ið BARN í númerið 1900 og gefa þannig 1900 krónur. Söfnunin er enn í fullum gangi og gengur vel.