Fóru í viðtal við króatíska sjónvarpsstöð | Mun styðja Ísland alla leið

„Við vorum teknir í viðtal á sjónvarpsstöðinni HRTV 4 í dag,“ sagði Sigurður Þór Þórsson sem staddur er út í Króatíu til að fylgjast með íslenska landsliðinu í knattspyrnu.

Ísland mætir Króatíu í síðari leik liðanna í umspilinu um sæti á HM í Brasilíu sem fram fer næsta sumar.

Darri Stanko Miljevic er ásamt þremur tengdasonum sínum. Miljevic er Króati en mun styðja íslenska landsliðið á Maksimir-vellinum annað kvöld.

Þeir Sigurður Þór Þórsson, Rafn Árnason og Hjalti Rögnvaldsson eru með Darra í ferðinni og hafa þeir fengið þó nokkra athygli frá króatískum fjölmiðlum.

„Þeir vildu vita hvernig okkur líkaði dvölin hér í Zagreb og hvað væri okkar álit á leiknum annað kvöld. Darri fór í viðtal og fór það allt fram á króatísku. Darri hefur ekki komið hingað í 42 ár og fékk eðlilega þá spurningu hvort hann ætlaði sér að sitja Króatíumegin eða vera með okkur Íslendingum í stúkunni annað kvöld. Hann svaraði því skýrt og sagðist vera gallharður Íslendingur.“

„Stemningin er rosalega góð hér út og um 700 Íslendingar mættir á svæðið. Menn skemmtu sér vel hér í gærkvöldi og voru margir Íslendingar fram til þrjú um nótt að skemmta sér, en hér loka skemmtistaðir um það leyti.“

„Þegar við lentum keyrðu þrjár rútur okkur á hótelið í lögreglufylgd og greinilega mikið umstang í kringum þennan leik. Fólk er aðallega að tala um hversu magnað það er að svona lítil þjóð sé komin svona langt í þessari keppni. Króötum finnst í raun magnað hvað fólk frá svona litlu landi er tilbúið að leggja á sig til að styðja sitt lið.“

Vísir greindi frá því í morgun að leikmenn króatíska liðsins hefðu drukkið þó nokkra bjóra eftir fyrri leik liðanna á Laugardalsvelli á föstudaginn.

„Við höfum aðeins orðið varir við umfjöllun um það hér í Króatíu en það fer samt ekki mikið fyrir þessu. Króatar virðast vera nokkuð smeykir eftir fyrri leikinn og hræðast þeir nokkuð að leikmenn króatíska liðsins séu að vanmeta íslenska landsliðið. Þeir eru ekki eins kokhraustir núna og þeir voru fyrir nokkrum dögum. Það er líka eðlilegt, við erum alltaf að fara taka þennan leik á morgun.“