Eiður og Birkir Már byrja gegn Króatíu

Lars Lagerbäck gerði tvær breytingar á byrjunarliði Íslands gegn Króatíu í kvöld eins og búast mátti við.

Eiður Smári Guðjohnsen tekur sæti Kolbeins Sigþórssonar í sóknarlínu Íslands en Kolbeinn meiddist í fyrri leiknum á Laugardalsvelli og fór ekki með til Króatíu.

Þá snýr Birkir Már Sævarsson aftur í stöðu hægri bakvarðar eftir að hafa tekið út leikbann á föstudagskvöldið. Hann tekur sæti Ólafs Inga Skúlasonar sem fékk að líta rauða spjaldið í fyrri leiknum.

Að öðru leyti er liðið skipað sömu leikmönnum og náðu markalausu jafntefli á Laugardalsvellinum. Leiknum verður lýst beint hér á Vísi.

Guðmundur Benediktsson greindi stuðningsmönnum Íslands frá byrjunarliðinu á töflufundi nú rétt í þessu en hann mun lýsa leiknum beint á Bylgjunni í kvöld.

Lið Íslands (4-4-2):

Hannes Þór Halldórsson

Birkir Már Sævarsson

Kári Árnason

Ragnar Sigurðsson

Ari Freyr Skúlason

Jóhann Berg Guðmundsson

Aron Einar Gunnarsson

Gylfi Þór Sigurðsson

Birkir Bjarnason

Eiður Smári Guðjohnsen

Alfreð Finnbogason