Hannar kápu fyrir Moleskine

„Ég elska Moleskine sjálf svo ég er alveg rosalega ánægð með þetta,“ segir myndlistarkonan Sunna Ben, en hún er ein tuttugu listamanna sem fengnir voru til að hanna bókarkápu Moleskine glósubókanna.

Um ákveðna viðhafnarútgáfu er að ræða en ítölsku Moleskine-bækurnar hafa um langt skeið verið vinsælar víða um heim og eru þekktar fyrir stílhreint yfirbragð. Nú ætlar hönnunarfyrirtæki í Amsterdam hins vegar að krydda upp á útlitið.

„Ég átti heima í Amsterdam í mörg ár og vinkona mín þaðan er að vinna hjá fyrirtæki sem heitir Uncover Lab og hún hafði samband og bað mig um að hanna kápu. Það var víst einhver samkeppni í Amsterdam en ég slapp við að taka þátt í henni,“ segir Sunna og hlær, en hún lærði sjálf myndlist í Amsterdam.

Hægt er að verða sér út um eintak af Moleskine með kápu eftir Sunnu á vefsíðu Uncover Lab.