Júlíus Vífill: Skuldir hafa aukist um 115% í tíð meirihlutans

„Það ber að virða þessa ákvörðun hjá borgarstjóranum,“ segir Júlíus Vífill Ingvarsson, borgarfulltrúi Sjálfstæðisflokksins, um ákvörðun Jóns Gnarr að sækjast ekki eftir endurkjöri sem borgarstjóri.

Júlíus segir að samstarf hans og Jóns hafi verið ágætt. „Við höfum auðvitað haft ólíkar áherslur. Ég hef gagnrýnt störf hans og meirihlutans. Það snýst þó aðeins um málefni en ekki sem persónu hans. Það er margt sem ég tel gagnrýnisvert við störf meirihlutans á þessu kjörtímabili. Fjárhagsáætlun næsta árs var lögð fram á borgarstjórnarfundinum í gær þar sem fram kemur að skuldir hafa aukist um 115% í tíð meirihlutans og borgarsjóður hefur verið rekinn með halla á hverju einasta ári á þessum sama tíma,“ segir Júlíus Vífill.

Hann telur of snemmt að meta það hvort að ákvörðun borgarstjórans muni hafa mikil áhrif á pólitískt landslag í borginni. Tíminn muni leiða það í ljós að mati Júlíusar.

„Jón hefur mörg áhugamál sem hann hefur þurft að leggja til hliðar á tíma sínum sem borgarstjóri. Ég óska honum velfarnaðar í þeim störfum sem hann mun taka að sér fyrir hendur í framtíðinni.“