"Tek Helga Hjörvar með mér í fríið næst“

Vinnan við lausn á skuldavanda heimilanna er á áætlun, segir forsætisráðherra. Hann hefur hinsvegar áhyggjur af því að stjórnarandstaðan muni tefja málið í þinginu.

Bjarni Benediktsson, fjármálaráðherra sagði á Alþingi í síðustu viku að hann væri ekki vongóður um að vænta mætti aðgerða vegna skuldavanda heimilanna fyrir áramót. Tvær nefndir vinna nú að tillögum um málið og eiga þær að skila þeim af sér í næsta mánuði. Þær verða í kjölfarið teknar til meðferðar hjá þinginu.

„Bjarni var, fannst mér, fyrst og fremst að lýsa áhyggjum af því að það gæti tekið tíma að koma þessu í gegnum þingið og það er í sjálfu sér eðlilegar áhyggjur miðað við hvernig stjórnarandstaðan hefur talað, í það minnsta hluti hennar. Vonandi eru þessar áhyggjur ekki réttmætar, vonandi vinnur stjórnarandstaðan bara með okkur að því að koma þessu sem hraðast í gegn," segir Sigmundur Davíð.

Þið gangið semsagt ennþá í takt, þú og Bjarni?

„Jájá, enda er þetta skýrt útlistað í stjórnarsáttmálanum og engin ástæða til að ætla að Sjálfstæðisflokkurinn ætli ekki að fylgja stjórnarsáttmálanum."

Sigmundur viðurkennir að hann finni fyrir óþreyju á meðal almennings sem beðið hefur eftir tillögum um hvernig eigi að leysa skuldavanda heimilanna. „Já, auðvitað finnur maður fyrir því. En þá er mikilvægt að hafa í huga að þetta ferli sem er í gangi núna er í samræmi við það sem var rætt fyrir kosningar en ég er bjartsýnn á framhaldið.“

Það vakti athygli í síðustu viku þegar Sigmundur var fjarverandi frá Alþingi og sköpuðust um það töluverðar umræður. Meðal annars gagnrýndi Helgi Hjörvar, þingmaður Samfylkingarinnar forsætisráðherrann harðlega fyrir að vera ekki viðstaddur í óundirbúnum fyrirspurnartíma. En hvar var Sigmundur?

„Þetta var svolítið skrýtið. Fyrrverandi forsætisráðherra hvarf nú oft langtímum saman án þess að við værum mikið að fara á taugum út af því. Ég tók mér fimm daga frí, fyrsta alvöru fríið frá því að ég byrjaði í stjórnmálum. Eftir að hafa fengið að vera í nokkra daga í fríi með konunni minni og barninu mínu sem er að verða tveggja ára get ég fullyrt að ég fer aftur í frí á næsta ári. Ef Helgi Hjörvar er ósáttur við það má hann bara koma með mér í fríið,“ segir Sigmundur.