Síld innan við brú í Kolgrafafirði

Síld er að öllum líkindum farin að ganga undir brúna í Kolgrafafirði á Snæfellsnesi eins og sést á meðfylgjandi myndbandi sem ljósmyndarinn Tómas Freyr Kristjánsson frá Grundarfirði gerði, svokallað „timelapse“, af náttúrunni í Kolgrafafirði og skipinu Jónu Eðvalds SF að veiða síld í mynni fjarðarins.

Eins og áður hefur verið sagt frá á Vísi hafa bæjaryfirvöld í Grundarfirði sóst eftir því að firðinum verði lokað til að stöðva gengd síldarinnar. Stór uppsjávarskip hafa verið að veiða síld í mynni fjarðarins og á svæðinu. Þegar síldin fer undir brúna geta þessu stóru skip ekki komist að henni. Smábátar geta þó á fjöru farið undir brúna, en margir slíkir eru nú á síldveiðum við norðanvert Snæfellsnes.

Glöggir áhorfendur myndbandsins geta séð eftir tvær mínútur að dökkur flekkur færist frá hægri til vinstri í sjónum. Þar er líklegast síldartorfa á ferð og stefnir hún að brúnni. Íbúar á svæðinu hafa einnig séð háhyrninga innan við brúna sem rennir enn frekar stoðum undir það að síldin sé farin að ganga undir hana.

Kolgrafafjörður og nágrenni from Tomas Kristjansson on Vimeo.