Októberfest í Laugardal næstu helgi

Nætu helgi 27.-28. september verður haldin Októberfest-hátíð í risatjaldi í Laugardal þar sem meðal annars koma við sögu fræðsluleikritið Bjórsaga með Víkingi Kristjánssyni leikara, fullorðinssirkusinn Skinnsemi, pub-quiz með Hjörvari Hafliðasyni knattspyrnusérfræðingi og landsliðið í uppistandi.

Djörf fjöllistasýning

Föstudagskvöldið verður lagt undir tvöfalda sýningu Bjórsögu Víkings og Skinnsemi. Sýningin hefst kl. 18:00. Skinnsemi er djörf fjöllistasýning með sirkusatriðum. Sýningunni lýkur kl. 21:00 og þá verður tjaldið opnað öllum gestum og gangandi.

Stjörnustríð

Það verður hálfgert stjörnustríð í dalnum þessa helgi, því á laugardeginum verður boðið upp á enska boltann á risatjaldi þar sem meðal annars koma fram tónlistarmaðurinn og knattspyrnukempan Jón Jónsson og Gunnar Helgason leikari og rithöfundur.

Hjörvar með pub-quiz

Pub-quiz Hjörvars verður kl. 18:00 á laugardeginum. Að því loknu eða um kl. 20:00 stígur einvalalið uppistandara á stokk, en þar verða á ferðinni Halldór Gylfason, Lee Nelson og Sólmundur Hólm, sem allir hafa rætur í Laugardal. Grallaraspóarnir Steindi & Ágúst Bent troða síðan upp í lokin og flytja öll sín bestu lög. Októberfest lýkur á miðnætti bæði kvöldin, en ábyrgðaraðili þess er knattspyrnudeild Þróttar. Aldurstakmark bæði kvöldin er 20 ár.

Bjórkynning

Bjórsérfræðingar Vífilfells kynna valdar tegundir í bjórgarði á laugardeginum. Gestir geta samhliða þessu öllu nælt sér í ljúffengar veitingar frá veitingabílum, sem verða umhverfis tjaldið, en það verður reist á svokölluðum Þríhyrningi milli Skautahallarinnar og félagsheimili Þróttar.

Hófstillt miðaverð

Miðaverði á Októberfest í Laugardal er stillt í hóf, en sýningin á föstudagskvöldið með Bjórsögu og Skinnsemi Sirkuss Íslands kostar gesti 3.000 krónur með innföldu bjórsmakki. Ókeypis verður á enska boltann og skemmtikvöldið á laugardegi. Einnig verður opnað fyrir gangandi umferð eftir að sýningunni lýkur á föstudagskvöldið, um kl. 21:00.

Sjá viðburð á Facebook.

Post by Lífið á Visir.is.