"Ég hef unnið 140 til 150% vinnu síðustu sex árin"

Í gær greindum við frá mikilli óánægju meðal yngri kynslóðar geislafræðinga, með nýjan kjarasamning þeirra við Landspítalann. Thelma Guðmundsdóttir er þrítug, hefur lokið fjögurra ára háskólanámi og unnið sem geislafræðingur í sex ár. Hún segir að þegar á heildina sé litið feli nýi kjarasamningurinn í sér tekjuskerðingu fyrir hana. Hún segir geislafræðinga skila 40 stunda vinnuviku á virkum dögum. „Við sem erum á vaktalínu vinnum fast þriðju hverja helgi þannig að 100% vinnuskylda hjá okkur er í raun 130%,“ segir Thelma. „Svo þurfum við að vinna töluvert mikið auka því það er mikið af langtímaveikindum, það þarf að sinna vöktum þeirra sem detta út. Svo er náttúrulega alltaf einhver að taka út frí og það þarf líka að sinna þeirra vöktum. Þannig að á heildina litið hef ég unnið 140-150% vinnu síðustu sex árin.“

Uppsagnir 40 geislafræðinga tóku gildi á miðnætti í fyrradag og þrátt fyrir að samningar hafi tekist hafði aðeins helmingur þeirra dregið uppsagnir sínar til baka um miðjan dag í dag. Einhverjir hafa þegar ráðið sig annað og aðrir ákveðið að setjast á skólabekk.

 Ert þú búin að taka ákvörðun um hvort þú dregur þína uppsögn til baka?

„Nei, ég ætla að taka mér helgina í það,“ segir Thelma.

Hún segir marga í sömu stöðu. Sjálf er hún búin að útvega sér starfsleyfi í Svíþjóð og Danmörku og íhugar sterklega að taka stökkið og flytja út. Hún segir mjög alvarlega stöðu skapast á Landspítalanum ef 20 geislafræðingar snúi ekki aftur. „Við erum undirmannaðar nú þegar þannig að 20 manns er rosalega stór hluti af batteríinu.“

Thelma segir mjög slæmt fyrir stéttina ef yngri kynslóðin dettur út. „Því þegar eldri kynslóðin hættir, sem er kannski eftir fimm til tíu ár, þá myndast mikið kynslóðabil í stéttinni og það eru ekki nógu margir að útskrifast árlega til að brúa það bil,“ segir Thelma að lokum.