Útlendingar gefa skít í Selfoss

Segja má að útlendingar gefi skít í Selfoss, í orðsins fyllstu merkingu, en bílstjóri rútu sem fór þar um með erlenda ferðamenn, gerði sér lítið fyrir og tæmdi kamarinn í vegkant skammt frá gámasvæði Selfyssinga.

Rétt áður en gámasvæðinu á Selfossi var lokað í gær klukkan sex fékk Ragnar Sigurjónsson, umsjónarmaður svæðisins, fréttir af því að stór rúta hefði komið að hlið svæðisins og þar hefði rútubílstjórinn sýnt ótrúlegan dónaskap með framferði sínu. Magnús Hlynur Hreiðarsson fréttamaður náði tali af Ragnari, en honum var verulega brugðið.

„Ég var ekkert að spá neitt sérstaklega í það af því hún hafði snúið við, bakkaði þarna eitthvað niður eftir og ég hélt í fyrstu að þetta væri einhver æfingarakstur eða eitthvað svoleiðis. En, svo skömmu síðar kemur maður þarna niður eftir, sem var að henda þarna rusli og segir við mig: Veistu hvað rútan var að gera þarna niður frá?

- Ég sagði, nei, ég hef ekki hugmynd um það.

- Hann var bara að sturta úr klósettinu þarna við veginn hjá þér.

- Ha? Var hann að gera það?

- Jájá, hann bara var bara að sturta.

Af því þegar maður er einn á svæðinu getur maður ekkert farið í burtu, það er það mikil traffík. En, þegar ég lokaði kíkti ég yfir þetta. Og það var nú sóðlegt um að lítast,“ segir Ragnar.

Rútan var erlend og fór svo beint á Hótel Selfoss þar sem farþegarnir og rútubílstjórinn dvöldu í nótt. Magnús hefur eftir Ragnari að hann skilji ekki framferði bílstjórans: „Mér finnst einhvern veginn eins og það sé verið að gefa skít í okkur. Mér finnst þetta frekar slappt og dónalegt. Þetta á ekki að þekkjast nú til dags, svona vinnubrögð. Frekar dapurlegt að þetta skuli gerast í dag og fyrir framan alla. Ég skil þetta bara ekki almennilega.“