Þrjú skemmtiferðaskip á sama tíma í Hafnarfjarðarhöfn

Mikið verður um að vera við Hafnarfjarðarhöfn um miðja næstu viku en þá munu þrjú skemmtiferðaskip leggjast þar að bryggju. Rúmlega eitt þúsund farþegar munu koma með skipunum.

Á þriðjudag og miðvikudag koma skemmtiferðaskipin Le Soleal, systurskipið Le Boreal og Astor til Hafnarfjarðar. Þau munu liggja saman við Suðurbakkann í Hafnarfjarðarhöfn. Le Soleal er glænýtt skemmtiferðaskip og lagði af stað í sína fyrstu för frá Feneyjum 1. júlí.

„Þetta er í fyrsta skipti sem þrjú skemmtiferðaskip koma til Hafnarfjarðar á sama tíma þannig að það er ljóst að það verður mikið um að vera í bænum og við höfnina þessa tvo daga. Þetta er auðvitað mjög jákvætt fyrir Hafnarfjörð og alla verslun og þjónustu í bænum,“ segir Sigvaldi Hrafn Jósafatsson, starfsmaður Gáru, en fyrirtækið sér um að þjónusta skemmtiferðaskipin þrjú.