Líklega um skyndiofnæmi eða of sterkar perur að ræða

„Ef að eitthvað svona kemur alveg út úr karakter hjá manneskju sem er vön sól er líklegt að viðkomandi hafi innbyrt eða notað eitthvað sem veldur skyndilegu sólarofnæmi. Annað hvort það eða að perurnar í bekkjunum þarna séu of sterkar.“ Þetta segir Baldur Tumi Baldursson, yfirlæknir húð- og kynsjúkdómalækninga á Landspítala um sólbruna Steinars Thorbergs, sólgleraugnasölumanns, sem Vísir greindi frá í dag.

Steinar segist vera mjög vanur sterkri sól þar sem hann var búsettur í Las Vegas í fjölda ára. Hann flutti nýlega aftur til Íslands og ákvað í gær að bregða sér í ljósabekk í fyrsta sinn í 22 ár. Fljótlega eftir tímann fór hann að finna fyrir miklum óþægindum og leitaði því fljólega á spítala þar sem kom í ljós að hann var með bruna á milli fyrsta og annars stigs. Steinar segir sársaukann hafa verið gríðarlegan og að hann hafi fengið morfín í æð.

Baldur Tumi segir auðvelt verk að mæla bekkinn og sjá hversu sterka geisla hann gefur frá sér. „Löglegir geislar eiga ekki að valda svona rosalegum viðbrögðum svo ef þetta er ástæðan er allt of mikill geislaskammtur í perunum. Venjulegir A-geislar sem eru í ljósabekkjum eiga ekki að valda svona viðbrögðum,“ segir hann. „Það gerist líka stundum að fólk getur orðið ofnæmt fyrir sól ef það borðar eða kemst í snertingu við lyf eða önnur efni sem hefur slík áhrif.“

Baldur furðar sig á að fólk noti ljósabekki þar sem skaðsemi þeirra liggi fyrir. „Það er algjör leyndardómur fyrir mér að fólk leggist í bekk sem eldir mann á 20 mínútum. Þetta er sú tegund útfjólublárra geisla sem gerir okkur eldri og hrukkóttari, fyrir utan það að þeir geta beinlínis verið hættulegir.“