Glæsimörk helgarinnar

Aðeins Reading og Liverpool buðu upp á markalaust jafntefli í 32. umferð ensku úrvalsdeildarinnar sem fram fór um helgina.

Harry Redknapp getur farið að búa lærisveina sína hjá Q.P.R. undir lífið í b-deildinni eftir 2-0 tap gegn Everton á Goodison Park. Lundúnarliðið á fimm leiki eftir og þarf að vinna fjóra auk þess að treysta á úrslit úr öðrum leikjum. Í allri hreinskilni er möguleikinn úti og sömu sögu má segja um Reading.

Mörkin úr leik Everton og QPR má sjá hér.

Erfitt var að sjá hverjir voru svekktari með úrslitin á Madejski-leikvanginum á laugardaginn. Reading og Liverpool tókst hvorugu að finna leiðina í netið en bæði lið dauðlangaði í stigin þrjú. Reading er í botnsæti deildarinnar með lakari markatölu en Q.P.R.

Þetta var annar markalausi leikur Liverpool í röð en liðinu tókst heldur ekki að skora á Anfield gegn West Ham fyrir viku. Liverpool siglir lygnan sjó í 7. sæti deildarinnar og allt útlit fyrir að sætið verði hlutskipti félagsins í lok leiktíðar.

Það helsta úr viðureign Reading og Liverpool má sjá hér.

Sunderland vann sigur helgarinnar á grönnum sínum í Newcastle. Paolo Di Canio fagnaði mörkum Sunderland sem óður væri enda fyrsti sigur liðsins undir stjórn Di Canio. Sunderland situr í 15. sæti með 34 stig líkt og Stoke og Aston Villa sem hafa lakari markatölu.

Glæsimörk Sunderland af St. James's Park má sjá hér.

Robin van Persie var sá eini sem ógnaði Di Canio hvað fagnaðarlæti varðaði. Michael Carrick kom Manchester United yfir snemma leiks og Van Persie bætti við marki úr vítaspyrnu.

Markið batt enda á tíu leikja þurrkatíð hjá Hollendingnum sem hljóp beint til stjórans Sir Alex Ferguson.

Mörkin og fagnið hjá Van Persie má sjá hér.

Mesta dramatíkin var þó á Emirates þar sem Arsenal sneri töpuðum leik sér í vil. Mikel Arteta jafnaði metin úr umdeildri vítaspyrnu fimm mínútum fyrir leikslok og við það snerist leikurinn. Oliver Giroud og Lukas Podolski tryggðu Arsenal sigur á sársvekktum leikmönnum Norwich sem fannst þeir eiga meira skilið út úr leiknum.

Dramatíkina á Emirates má sjá hér.

Aðrir leikir helgarinnar

Southampton 1-1 West Ham

Aston Villa 1-1 Fulham