Glæsimark Luiz og rangstöðumark Van Persie

David Luiz bauð áhorfendum á Craven Cottage gott kvöld með bylmingsskoti af 30 metra færi sem söng í markvinklinum í leik Chelsea gegn Fulham í gærkvöldi.

Chelsea vann nokkuð þægilegan 3-0 sigur en Fulham hafði þó brennt af dauðafæri áður en Brasilíumaðurinn reiddi til höggs. Glæsimarkið hjá Luiz má sjá hér.

John Terry skoraði tvö skallamörk og sá til þess að Chelsea hefur eins stigs forskot á Arsenal í baráttunni um þriðja sæti deildarinnar. Hinir bláklæddu eiga einnig leik til góða á liðsmenn Arsene Wenger.

Manchester United lenti í basli með spræka liðsmenn West Ham á Boylen Ground. Ricardo Vas Te og Momo Diame komu West Ham 1-0 og yfir og aftur í 2-1 í síðari hálfleik.

Hollendingurinn Robin Van Persie tryggði United jafntefli þegar hann fylgdi á eftir skoti Kagawa sem small í báðum stöngunum. Van Persie var klárlega rangstæður þegar Kagawa spyrnti en það fór framhjá aðstoðardómaranum. Mörkin úr leiknum má sjá í spilaranum hér fyrir ofan.

United hefur þrettán stiga forskot á City á toppnum þegar fimm umferðir eru eftir. City, sem lagði Wigan 1-0, á þó leik til góða og getur minnkað muninn í tíu stig. Carlos Tevez tryggði City sigur með glæsimarki sjö mínútum fyrir leikslok. Markið má sjá hér.