Fagnaðarefni að myndirnar séu komnar fram í dagsljósið

Á morgun klukkan 17 opnar sýning á verkum Sigríðar Björnsdóttur í Gallery Bakarí að Bergstaðastræti 14. Sýningin kallast Verk frá 1957-1973 og telur hún fjörutíu og þrjú verk eftir Sigríði. Mestur hluti þeirra hefur aldrei verið sýndur opinberlega. "Í myndum Sigríðar Björnsdóttur birtist sterkur listrænn persónuleiki, síleitandi og djúpt þenkjandi tilfinningamanneskja. Það er fagnaðarefni að þessar myndir skulu nú, seint og um síðarmeir, komnar fram í dagsljósið. Til þessa hefur verið talið að framlag Sigríðar Björnsdóttur til íslenskra sjónlista einskorðaðist við akrýlmyndirnar sem hún málaði á áttunda og níunda áratug síðustu aldar og rannsóknir hennar á myndlist barna og geðsjúkra. Sýningin sem hér getur að líta staðfestir svo ekki verður um villst, að með verkum sínum frá 1957-1973 eykur Sigríður markverðum kafla við lítt þekkta sögu samsettra verka í íslenskri nútímamyndlist, þ.e. sögu sem snýst um virkjun margs konar þrívíðs efniviðar á myndfleti, aðskotahluta, tilfallandi afganga af ýmsu tagi, jafnvel úrgangs. Það er að sjálfsögðu freistandi að tengja þráðbeint á milli þessara verka Sigríðar og blönduðu "úrgangsverkanna“ sem þáverandi eiginmaður hennar, Dieter Roth, gerði á öndverðum sjöunda áratugum. Vissulega þrætir Sigríður ekki fyrir það að sú "afbygging“ hins efnislega, og þá sérstaklega markvissar tilraunir Dieters til niðurbrots hins lífræna í verkum sínum, hafi ætíð verið henni uppörvun. En allar tilraunir til að kortleggja bein "áhrif“ verka hans á Sigríði stranda á beinhörðum staðreyndum, það er tímasetningum verkanna," segir í tilkynningu um sýninguna.