Keyrði öfugan hring í hringtorgi í Kópavogi

Eik Gísladóttir situr í ritstjórn Kvennablaðsins og segist hafa gert sig að fífli þegar hún var nýflutt heim og keyrði öfugan hring í hringtorgi í Kópavogi. 



Nafn? Eik Gísladóttir

Aldur? 38 ára

Starf? Sit í ritstjórn Kvennablaðsins. Menntuð grafískur hönnuður og hárgreiðslukona.

Hvern faðmaðir þú síðast? Strákana mína áður en þeir fóru í skólann.

En kysstir? Manninn minn áður en ég fór í vinnuna.

Hver kom þér síðast á óvart og hvernig?

Þegar Heiðar bauð mér og vinkonu minni til NY á tónleika sem mig langaði rosalega til að fara á. Frábær ferð. (Takk fyrir mig, Heiðar minn.)

Hvaða galla í eigin fari ertu búin að umbera allt of lengi?

Á erfitt með að treysta, vil helst gera allt sjálf svo að hlutirnir séu alveg eins og ég hugsaði þá. Er óþolinmóð og vil að hlutirnir gerist strax.

Ertu hörundsár?

Nei, það þekkist ekki á okkar heimili að fara í fýlu eða vera sár. Við bara ræðum hlutina.

Dansarðu þegar enginn sér til? Ég dansa alla daga, ein og þegar aðrir sjá til. Kemur manni í gírinn.

Hvenær gerðirðu þig síðast að fífli og hvernig?

Mér finnst gaman að gera mig að fífli og fá aðra til að hlæja. En ætli það hafi ekki verið þegar ég var nýflutt heim og fór öfugan hring á hringtorginu í Kópavoginum og mætti bíl.

Hringirðu stundum í vælubílinn?

Nei, það geri ég ekki. Það er minn stærsti kostur.

Tekurðu strætó? Nei, ég keyri bíl og hjóla mikið.

Hvað eyðirðu miklum tíma á Facebook á dag?

Allt of miklum. Hætti á Facbook í byrjun árs og eyddi 70% vina og kolféll svo og byrjaði aftur. Facebook er ávanabindandi.

Ferðu hjá þér þegar þú hittir fræga eða heilsarðu þeim?

Heilsaði þeim þar sem það var daglegt brauð að hitta þekktar manneskjur meðan við bjuggum úti en þegar ég hitti Gary Barlow þá titraði ég og hafði enga stjórn á taugunum.

Lumarðu á einhverju sem fáir vinir þínir vita um þig? Nei, ég er eins og opin bók. Hef ekkert að fela.

Hvað ætlarðu alls ekki að gera um helgina? Ég ætla ekki að baka og alls ekki að taka til.