Nýjar reglur settu svip sinn á "janúargluggann“

Eigendur enskra úrvalsdeildarliða í fótbolta voru ekki í miklu "stuði" á meðan leikmannamarkaðurinn var opinn í janúar. Lokað var fyrir félagaskipti á miðnætti þriðjudagsins 31. janúar. Met var sett í janúar í fyrra þegar liðin keyptu leikmenn fyrir 225 milljónir punda eða 43 milljarða kr., en þessi upphæð lækkaði um 70% í janúarglugga þessa árs.

Í samantekt sem alþjóðlega endurskoðunar- og ráðgjafarfyrirtækið Deloitte gaf út í gær kemur í ljós að ensku úrvalsdeildarliðin eyddu "aðeins" 60 milljónum punda eða sem nemur 11,6 milljörðum kr. í janúar á þessu ári.

Þrjú félög, Chelsea, QPR og Newcastle, eru samtals með um helming af þeirri upphæð.

Til samanburðar voru fjögur félög með um 80% af þessum 225 milljónum punda fyrir ári, Chelsea, Liverpool, Aston Villa og Liverpool. Þar léku framherjarnir Fernando Torres og Andy Carroll aðalhlutverkin.

Dan Jones, talsmaður Deloitte, segir í viðtali við breska fjölmiðla að skýringin á þessari lækkun sé einföld. Félögin eru að undirbúa sig fyrir reglugerð UEFA um leyfiskerfi og fjárhagslega háttvísi sem tekur gildi árið 2013. Þessi reglugerð var kynnt til sögunnar árið 2009 þegar helmingur af 630 knattspyrnuliðum Evrópu var rekinn með tapi.

Reglugerðinni er ætlað að minnka möguleika ríkra eigenda að eyða eins miklum peningum og þeir vilja í leikmannakaup og laga taprekstur með nýju "hlutafé" úr eigin vasa. Samkvæmt reglugerð UEFA um fjàrhagslega hàttvísi þurfa félögin að miða útgjöld sín við þær tekjur sem félagið getur aflað sér með "venjulegum hætti".

Ómar Smárason, leyfis – og markaðsstjóri KSÍ, sagði í samtali við Fréttablaðið að stærstu félög Evrópu hefðu haft frumkvæðið að þessari reglu á sínum tíma.

"Þetta er gert til þess að sporna við áframhaldandi taprekstri stórra félaga. Félögin vildu fá skýrari reglur og jafna samkeppnisaðstöðuna. Lið sem eru í eigu mjög ríkra einstaklinga geta ekki haldið áfram að reiða sig á að fá peninga endalaust til þess að brúa taprekstur. Þau verða að fara eftir reglugerðinni um leyfiskerfi og fjàrhagslega hàttvísi."

Það er áratugur frá því að sú regla var tekin upp að opna fyrir félagaskipti í janúar og frá þeim tíma hafa ensk úrvalsdeildarlið keypt leikmenn fyrir samtals 925 milljónir punda eða sem nemur 180 milljörðum kr.