Elti ungar stjörnur um heiminn

Önnur sería sjónvarpsþátta Ragnhildar Steinunnar Jónsdóttur, Ísþjóðarinnar, hefur göngu sína á sunnudaginn. Að þessu sinni flakkaði Ragnhildur Steinunn heimshorna á milli til að eltast við unga Íslendinga sem eru að gera það gott.

Í fyrsta þætti nýju seríunnar hittir Ragnhildur Steinunn krakkana í hljómsveitinni Of Monsters and Men sem hafa heldur betur slegið í gegn á heimsvísu. Ragnhildur fékk að slást í för með sveitinni er þau voru á tónleikaferðalagi um Bretland og einnig heimsótti hún söngvarana Nönnu og Ragga á æskuslóðum þeirra. „Við vorum viðstödd fyrstu tónleika sveitarinnar í Bretlandi. Þar náði ég tali af nokkrum aðdáendum sem eru á öllum aldri," segir Ragnhildur sem skemmti sér vel með sveitinni. „Hljómsveitarmeðlimir eru allt mjög ólíkar týpur, jarðbundnir og skemmtilegir krakkar."

Fyrsta sería Ísþjóðarinnar mæltist vel fyrir og kemur meðal annars fyrir sjónir finnskra áhorfenda á sjónvarpstöðinni FST þar sem Ísþjóðin verður sýnd á næstunni. Ragnhildur fullyrðir einnig að aðrar norrænar stöðvar hafi sýnt þáttunum mikinn áhuga.

Í nýju seríunni fer Ragnhildur ekki bara í tónleikaferðalag því hún hélt til Mónakó í sumar þar sem hún heimsótti snjóbrettakappann Halldór Helgason sem lifir þar sældarlífi á milli þess sem hann keppir á stórmótum um allan heim. Einnig fá áhorfendur að kynnast leikkonunni ungu Heru Hilmarsdóttur sem leikur hlutverk í myndinni Anna Karenina með stórleikurunum Jude Law og Keiru Knightley en Ragnhildur hitti Heru á tökustað í Wales þar sem hún leikur í sjónvarpsþáttum á vegum BBC.

Ísþjóðin er sýnd á sunnudögum á Ríkissjónvarpinu klukkan 19.40.-áp