Kraftaverkastúlkan Þuríður

„Staðan á minni stjörnu er ofsalega góð í dag. Hún fór í rannsóknir í byrjun janúar og kraftaverkin hjá henni halda áfram að gerast og æxlið fer minnkandi," segir Áslaug Ósk Hinriksdóttir, móðir Þuríðar Örnu Óskarsdóttur, níu ára, sem greindist með illvíga flogaveiki og góðkynja æxli í heila 25. október árið 2004, þá tveggja og hálfs árs gömul.

Æxlið getur komið aftur og aftur

„Þetta æxli sem Þuríður er með getur komið aftur og aftur þannig það er alltaf mikill kvíði og stress fyrir hverja myndatöku sem Þuríður fer í þótt hún sýni engar aukaverkanir. Þegar hún greindist aftur í maí árið 2010 ætluðum við einmitt að fara að ljúka þessum kafla í lífi okkar og byrja á nýjum og skemmtilegum kafla en því miður varð það ekki raunin," segir Áslaug.

Lamaðist hægra megin eftir geislameðferð

„Þuríður fór beint eftir þá greiningu til Svíþjóðar og lagðist undir svokallaðan „gammahníf" sem er geislameðferð og út frá henni lamaðist hún algjörlega á hægri hluta líkamans á einum sólarhring. Hún þurfti í kjölfarið að fara í fimm mánaða sterameðferð sem var hreint helvíti fyrir hana en lömunin gekk til baka. Hún var þá líka farin að fá krampa á hverjum degi aftur en í dag fær hún stöku sinnum krampa. Mér finnst virkilega sárt og erfitt að horfa upp á hana í krömpum en núna erum við bara á fullu að reyna að byggja hana upp líkamlega."

Uppbygging fram undan

„Hún var í fimleikum fyrir áramót hjá Ármanni þar sem fólk gerir allt fyrir hana. Við þurfum bara að nefna það, þá gera þau það. Það er ómetanlegt fyrir hana og okkur. Hún er annars að byrja í sjúkraþjálfun á hestum og strax eftir það förum við norður með hana í sjúkraþjálfun á skíðum. Við viljum hafa uppbyggingu Þuríðar sem fjölbreytilegasta þannig að henni finnist skemmtilegt.

„Án félagsins okkar, Styrktarfélags krabbameinssjúkra barna, gæti Maístjarnan mín ekki farið í alla þessa þjálfun þar sem þetta kostar mikið og við höfum ekki efni á þessu sjálf. Það er ómetanlegt að hafa svona sterkt félag sem styður við bakið á okkur. Ég vil endilega koma því á framfæri líka að læknar og hjúkrunarfólk sem hafa séð um Þuríði eru gull af mönnum og gera allt til að hjálpa okkur. Við erum kannski ekki alltaf sátt við útkomuna en við komumst alltaf að sameiginlegri niðurstöðu."