Vó sjáðu besta skíðamann Íslands á ystu nöf

Björgvin Björgvinsson, skíðamaður frá Dalvík, fékk um daginn tækifæri sem marga skíða- og brettamenn dreymir um, að fá einkaþyrlu til að skutla sér upp á fjallstoppa. Í auglýsingu sem Hvíta húsið og Truenorth gerðu á dögunum var honum skutlað upp og hann kvikmyndaður á niðurleiðinni.

Það er óhætt að segja að stundum hafi Björgvin farið út á yrstu nöf en í meðfylgjandi myndbandi má meðal annars sjá hann detta á nokkuð skrautlegan hátt.

Fyrir tökurnar var þyrlan útbúin með sérstakri myndavél sem er mikið notuð erlendis við tökur á skíðamyndböndum. Myndavélin er þeim eiginleikum búin að hún helst stöðug þrátt fyrir að þyrlan hristist og snúist. Það kom sér vel þegar veður versnaði óvænt á tökudaginn og hraktist þyrlan undan hríðarstormi og versnandi skyggni. Að lokum þurfti að fresta tökum þegar ísing settist á þyrluspaðana.

Til allrar hamingju gafst tækifæri til að halda áfram daginn eftir og þrátt fyrir erfiðar aðstæður náðist mikið að flottu myndefni.

Hér fyrir ofan og á Vísir Sjónvarp má sjá umrætt myndband með aukamyndefni en auglýsinguna í heild sinni má sjá á vef Hvíta hússins.