Hlemmi breytt í tónleikastað

„Við vorum að gæla við þessa hugmynd í fyrra en gátum ekki hrint henni í framkvæmd þá. Við ákváðum því að gera þetta í ár og Strætó tók vel í hugmyndina,“ segir Alísa Kalyanova sem skipuleggur utandagskrártónleika í tengslum við Iceland Airwaves. Tónleikarnir fara fram á Hlemmi og á skiptistöðinni í Mjódd.

Innt eftir því af hverju skiptistöðvarnar tvær hafi orðið fyrir valinu segir Alísa að sér þyki staðirnir heillandi. „Ég er rússnesk og upplifi staðina kannski á annan hátt en borgarbúar. Í hvert sinn sem ég fer þangað hitti ég forvitnilega karaktera og þarna kemur saman alls konar fólk á öllum aldri. Mér fannst hugmyndin um að breyta þessu í tónleikastað heillandi.“

Meðal þeirra hljómsveita sem koma fram á viðburðunum eru Hollow Veins, Sindri Eldon, Anton Kaldal og Futuregrapher. Að sögn Alísu verður einblínt á rokktónlist í Mjóddinni og raftónlist á Hlemmi. Alísa reiknar með að tónleikagestirnir verði ólíkir hinum hefðbundna Airwaves-gesti. „Ég geri ráð fyrir að þetta verði fyrst og fremst fólk sem á leið hjá. Kannski ákveður það í kjölfarið að sækja fleiri utandagskrártónleika, þá væri takmarkinu náð.“

Alísa verður viðstödd báða tónleikana og sér til þess að allt fari vel fram. „Ég verð á staðnum og dreifi eyrnatöppum til þeirra sem þola ekki hávaðann,“ segir hún og hlær.

Tónleikarnir í Mjódd fara fram á föstudeginum klukkan 16 til 18 og þeir á Hlemmi fara fram á laugardeginum og standa yfir frá 15 til 19.