Andleg fegurðarsamkeppni

„Ég á von á hörkukeppni enda tel ég að ungmenni séu betur að sér í ár en nokkru sinni fyrr,“ segir Atli Freyr Steinþórsson, sem senn tekur sæti við hlið Þórhildar Ólafsdóttur sem spurningahöfundur og dómari í Gettu betur, hinni sívinsælu spurningakeppni framhaldsskólanna.

Þetta er í fyrsta sinn sem Atli starfar í sjónvarpi en hann er þó vel kunnur keppninni og Ríkissjónvarpinu. Atli hefur starfað sem útvarpsþulur á Rás 1 síðan 2005, en þar les hann meðal annars dánarfregnir og jarðarfarir, auglýsingar, kynningar milli þátta og stjórnar útsendingum.

„Ég held að flestir landsmenn ættu að kannast við röddina í mér og ég uni mér vel bak við hljóðnemann í Efstaleitinu. Auglýsingar frá ónefndum hamborgarastað ættu til dæmis að vera útvarpshlustendum að góðu kunnar,“ segir Atli hlæjandi.

Hann þurfti ekki að hugsa sig tvisvar um er honum bauðst að taka að sér hið ábyrgðarfulla starf dómara og er þess fullviss að reynsla hans úr Gettu betur hafi skipt máli.

Sjálfur er Atli tvöfaldur meistari í spurningakeppninni en hann keppti fyrir hönd Menntaskólans í Reykjavík árin 2002 og 2003. Atli var einnig í liðinu er MR tapaði eftirminnilega fyrir Borgarholtsskóla árið 2004. 

„Einhverra hluta vegna muna flestir eftir þeirri dramatísku viðureign, enda var það í fyrsta sinn í mörg herrans ár sem MR tapaði í Gettu betur,“ segir Atli en kveðst þó bara eiga góðar minningar úr keppninni. 

„Ég eignaðist marga góða vini og þetta var mjög góður tími. Í raun mætti kalla þetta andlega fegurðarsamkeppni.“ 

Þrátt fyrir að vera fyrrverandi MR-ingur ætlar Atli ekki að hygla neinum og segist verða nokkuð harður í horn að taka sem dómari. 

„Mig langar að hækka nördastuðulinn í keppninni. Við Þórhildur ætlum að hittast í október á Akureyri og eiga eina góða vinnuhelgi þar. Þetta verður bara fjör.“