Eðlumaðurinn mætir í Súlnasal

„Þetta er í fyrsta skipti sem sýningin er haldin og við eigum von á mörgum af stærstu nöfnum tattú-heimsins,“ segir Fjölnir Geir Bragason, betur þekktur sem Fjölnir tattú, um hátíðina Icelandic tattoo expo, sem verður haldin í Súlnasal Hótels Sögu um helgina.

Von er á um 35 erlendum og tíu íslenskum húðflúrurum á sýninguna. „Sumt af þessu fólki er með upp í tveggja ára langa biðlista svo það er geggjað að hafa tækifæri til að komast að hjá þeim,“ segir hann en hægt verður að fá flúr á sýningunni. Óski fólk þó eftir því að vera skreytt af sérstökum flúrara mælir Fjölnir með að haft sé samband við þann aðila fyrir fram og pantaður tími. Hann nefnir sem dæmi flúrarann Colin Dale, sem er einn sá frægasti í bransanum og handstingur öll sín tattú.

Margir þekktir gatarar verða einnig á sýningunni og alls kyns viðburðir verða í boði. Þar má meðal annars nefna að japanski dansarinn Sana verður með danssýningu og ljósmyndarinn Mick verður með myndasýningu. „Mick hefur ferðast um heiminn og tekið myndir af húðflúri. Það er mjög áhugavert að sjá hvernig flúrið breytist eftir menningarsvæðum,“ segir Fjölnir.

Hljómsveitin Contalgen Funeral spilar á laugardagskvöld og hinn frægi Lizardman mætir á svæðið, en hann er flúraður eins og eðla og með klofna tungu. „Svo verðum við með keppnir í gangi þar sem fólk getur mætt með flúrið sitt og átt möguleika á að komast í erlend tattúblöð,“ segir Fjölnir.- trs