Okkar karakter mun fyndnari

„Hann var að öllum líkindum að stela þessu af okkur," segir Dóri DNA.

Einræðisherra hans í væntanlegu gamanþáttunum Mið-Íslandi er ótrúlega líkur einræðisherranum sem Sacha Baron Cohen túlkar í sinni nýjustu gamanmynd , The Dictator, og gerði mikinn óskunda fyrir Óskarsathöfnina á sunnudaginn.

Báðir eru þeir klæddir hvítum jakkafötum með skrauti framan á, með borða yfir öxlina, hatt á höfði og fúlskeggjaðir.

„Okkar er mjög sérstakur. Hann tekur þátt í arkitektasamkeppni og kemur frá Perú en kemur hans karakter ekki frá Pakistan?" segir Dóri og bætir við: „Við höfðum ekki hugmynd um þetta. Þegar einræðisherrann var skrifaður átti hann að líta miklu meira út eins og skæruliði en það er líklega bara ein leið til að sýna einhverja svona einræðisherra," segir hann.

„Þetta er reyndar rosalega lítið hlutverk í einum þættinum og meira að segja er ég með skegg eins og hann á kynningarmyndinni en í þáttunum er ég ekki með skegg, bara hýjung. Þannig að líkindin eru ekki alveg eins mikil og maður mætti halda. Fyrir utan það held ég að okkar karakter sé miklu fyndnari en þetta drasl. Mér sýndist þetta vera heldur þunnur þrettándi," segir hann um persónu Sacha Baron Cohen. -fb