Umdeild fæðing Blue Ivy

Tónlistarhjónin Beyonce Knowles og Jay-Z eignuðust sitt fyrsta barn á Lenox Hill sjúkrahúsinu í New York á laugardaginn síðasta. Stúlkan hlaut nafnið Blue Ivy Carter og hafa fjölmiðlar birt margar furðulegar fréttir um fæðingu barnsins.

Sögusagnirnar hófust strax á meðgöngunni og var Beyoncé sökuð um að ljúga um ástand sitt. Sum tímarit héldu því fram að söngkonan væri alls ekki barnshafandi og að bumban væri aðeins púði. Söngkonan var þó flutt á Lenox Hill sjúkrahúsið þann 7. janúar síðastliðinn þar sem hún fæddi Blue Ivy.

Sögusögnunum hefur þó ekki linnt og eru hjónin sögð hafa rifið niður veggi á fæðingardeild spítalans og þannig breytt sex herbergjum í tvö stór herbergi sem þau ein höfðu aðgang að. Starfsfólk Lenox Hill-sjúkrahússins hefur reynt að tala niður umstangið en vefsíðan TMZ komst yfir teikningar af fæðingarstofu Beyoncé og Jay Z.

Herbergið minnir á þakíbúð Four Seasons-hótelsins, fjórir flatskjáir prýða það, raftæki af bestu gerð eru til taks og nútímalistaverk ef fólk vill slaka aðeins á. Talsmaður spítalans vísaði því hins vegar á bug að herbergið hafi verið sérstaklega útbúið fyrir tónlistarhjónin, þau hafi hins vegar verið þess heiðurs aðnjótandi að vígja það. Tímaritið US Weekly greinir einnig frá því að öðrum hjónum hafi verið meinaður aðgangur að fæðingardeildinni af lífvörðum Jay-Z. Fréttirnar vöktu athygli heilbrigðisyfirvalda New York-borgar sem ákváðu í kjölfarið að skoða málið nánar.

Einnig er talið að hjónin hafi eytt hátt í tvö hundruð milljónum króna í barnaherbergi dótturinnar. Á meðal þess sem herbergið hefur upp á að bjóða er rugguhestur úr gulli sem talið er að hafi kostað um 75 milljónir króna, vagga sem kostaði um tvær og hálfa milljón, og barnastóll sem kostaði í kringum tvær milljónir króna. Þau skötuhjú eru þó ekki bara að hugsa um gull og glingur fyrir Blue Ivy því samkvæmt Daily Star hafa þær gjafir sem þau hafa fengið frá frægum vinum á borð við Opruh Winfrey og P. Diddy verið látnar rennar til góðgerðarsamtaka.

sara@frettabladid.is