Stóri dagurinn hjá Balta á fimmtudag

Kvikmyndin Contraband verður frumsýnd á fimmtudaginn í Bandaríkjunum en hún er endurgerð hinnar rómuðu íslensku kvikmyndar, Reykjavik-Rotterdam eftir Óskar Jónasson. Myndin skartar Mark Wahlberg og Kate Beckinsale í aðalhlutverkum en Baltasar Kormákur situr í leikstjórastólnum. Hann lék hins vegar aðalhlutverkið í íslensku útgáfunni sem fékk feykilega góða dóma og mikla aðsókn.

Wahlberg hefur verið duglegur að hrósa íslensku útgáfunni í viðtölum vegna myndarinnar.

„Mér fannst íslenska útgáfan virkilega svöl. Maður horfir oft á erlendar myndir og hugsar með sjálfum sér að maður gæti endurgert hana í Bandaríkjunum. En það er yfirleitt ekki svo. Reykjavik-Rotterdam var hins vegar fersk og öðruvísi og okkur fannst hún ganga upp. Þannig að við settumst niður með Baltasar, réðum frábæran handritshöfund og í kjölfarið fór boltinn að rúlla."

Samkvæmt vef imdb.com er kostnaður við gerð myndarinnar um fjörtíu milljónir dollara eða tæpir fimm milljarðar íslenskra króna. Myndin verður frumsýnd hér á landi þann 20.janúar. - fgg