Bogomil Font gerist framkvæmdastjóri ÚTÓN

„Ég geri mitt besta í þessu,“ segir tónlistarmaðurinn Sigtryggur Baldursson sem tekur 1. febrúar við starfi framkvæmdastjóra Útflutningsskrifstofu íslenskrar tónlistar, ÚTÓN. Fréttablaðið greindi frá því fyrir áramót að þetta væri í bígerð og í gærmorgun gekk stjórn ÚTÓN frá ráðningunni.

„Það góða við þetta er að ég er að ganga inn í mjög gott batterí sem er mjög vel skipulagt og virkar vel. Það finnst mér skemmtilegast við þetta. Þetta gerir mikið gagn og vonandi kemur þetta til með að gera ennþá meira gagn í náinni framtíð,“ segir Sigtryggur, sem er ráðinn tímbundið til hálfs árs. Eftir það verður tekin ákvörðun með framhaldið.

Aðspurður hvort þetta verði ekki þægilegt skrifstofustarf segir Sigtryggur, sem er einnig þekktur sem Bogomil Font, að sú sé ekki raunin nema að litlu leyti. „Þetta er auðvitað skrifstofustarf en gengur líka út á upplýsingamiðlun og -öflun. Þetta gengur að stórum hluta út á að tala við fólk og ég er fínn í því.“

Sigtryggur er enn einn Sykurmolinn sem festir rætur, ef svo má segja, í góðri skrifstofuvinnu. Síðast gerðist Einar Örn Benediktsson borgarfulltrúi. „Það má segja að Bragi [Ólafsson] hafi verið duglegastur. Hann gerðist rithöfundur strax en við erum að þroskast upp í að taka því aðeins rólegra. Eins og góð kona sagði við mig: „Sumir eru bara svona seinþroska“,“ segir Sigtryggur og hlær.

Samhliða vinnu sinni hjá ÚTÓN heldur Sigtryggur áfram starfi sínu við Hljómskálann í Sjónvarpinu. Vinna við fimm nýja þætti er hafin, auk þess sem trymbillinn verður spyrill í forkeppni Eurovision-keppninnar þar sem hann ræðir við lagahöfunda.

Anna Hildur Hildibrandsdóttir segir núna skilið við ÚTÓN eftir fimm ára starf. „Þetta er búinn að vera frábær tími. Þetta er eiginlega algjört draumadjobb að fá að vinna við og markaðssetja íslenska tónlist erlendis. Ég kveð líka mjög glöð yfir því að við höfum náð góðum árangri,“ segir Anna Hildur. Haft hefur verið samband við hana vegna starfs á Norðurlöndunum. Ekkert er þó frágengið í þeim efnum en samkvæmt heimildum Fréttablaðsins er um að ræða starf hjá Útflutningsskrifstofu norrænnar tónlistar, NOMEX.

freyr@frettabladid.is