Þættir Andra á flandri til Noregs

Þættir Andra Freys Viðarssonar, Andri á Flandri, sem voru teknir upp viðsvegar á Íslandi, hafa verið teknir til sýninga hjá norska ríkisútvarpinu NRK 2. Þáttur númer 2 var sýndur í gær. Þá hefur sænska ríkisútvarpið fengið til sýninga Andralandsþættina, sem voru að mestu leyti teknir upp á höfuðborgarsvæðnu.

Andri segist ánægður með að þættirnir hafi þegar verið teknir til sýninga í Noregi. „Það er svolíitð gaman. Þetta er svolítið happadrætti, það eru ekki allir þættir sem lenda í þessu," segir Andri. Hann býst þó ekki við því að verða frægur þar.

„Nei, er það? Þegar við horfum á norska þætti hérna þá munum við ekki hvernig þetta fólk lítur út," segir hann. Hann segist hafa meiri vonir um Svíþjóð, en þar verður Andraland sýnt. „Það væri nú skemmtilegt að verða vinsæll þar," segir Andri.

Þrátt fyrir áhuga Norðmanna og Svía hafa Danir ekki enn sýnt þáttunum áhuga. „Þeir eru bara ábyggilega að bíða og sjá hvernig þetta fer í hin Norðurlöndin," segir Andri. Hann vonast líka til að Vesturheimaserían fari til Bandaríkjanna.

Þess má geta að nýju þættir Andra á flandri um Vesturheima verða sýndir frá og með 4. október í Ríkissjónvarpinu.