Tígurinn í Rotterdam gleðiefni fyrir Svartur á leik

Kvikmyndin Svartur á leik hefur verið valin til að keppa um Tígurinn á kvikmyndahátíðinni í Rotterdam. Myndin verður því heimsfrumsýnd í hollensku borginni í byrjun febrúar en hérna heima í mars. Svartur á leik er byggð á samnefndri sögu Stefáns Mána og skartar þeim Þorvaldi Davíð og Jóhannesi Hauki Jóhannessyni í aðalhlutverkum.

Þórir Snær Sigurjónsson segir þetta vissulega mikið gleðiefni. „Við prófuðum bara að senda hana inn og vissum ekkert hverju við áttum von á. Núna erum við bara að hamast við að ganga frá smáatriðum og klára myndina,“ segir Þórir en mikill áhugi virðist vera fyrir myndinni, sýningarrétturinn hefur þegar verið seldur til Bretlands, Sviss og Skandinavíu.

„Við erum síðan á leiðinni til Berlínar og gerum okkur vonir um góðar viðtökur þar,“ bætir Þórir við.

Hann viðurkennir að nafn Nicolas Winding Refn hafi hjálpað myndinni en hann er einn af framleiðendum hennar. Nýjasta mynd Refns, Drive, hefur slegið rækilega í gegn og hefur verið á toppi flestra árslista kvikmyndavefsíða.

„Það hjálpar og svo skemmir heldur ekkert fyrir að myndin er í hans anda.“ Alls keppa tólf myndir um Tígurinn í Rotterdam en verðlaunin eru veitt fyrir bestu fyrstu eða aðra mynd leikstjóra. -fgg