Níu prófmál af 11 ekki komin til dómstóla

Aðeins tvö prófmál af ellefu, sem eiga að skera á gengislánahnútinn, eru komin inn í dómskerfið.

Nýjasti kaflinn í gengislánasögunni eftir hrun hófst með dómi í febrúar þegar Hæstiréttur kvað upp úr með það að óheimilt væri að reikna afturvirka seðlabankavexti á ólögleg gengislán. Fjórum og hálfum mánuði síðar höfðu bankarnir og fulltrúar skuldara komið sér saman um 11 prófmál til að sækja fyrir dómstólum til að greiða úr um 20 álitamálum sem enn sátu í gengislánaflækjunni.

Sex prófmálanna eru sótt vegna bíla- og húsnæðisskulda einstaklinga - og fimm vegna fyrirtækjalána sem hlaupa á hundruðum milljóna.

Öll málin verða sótt fyrir Héraðsdómi Reykjavíkur, þar sem flýtimeðferð hefur verið samþykkt. Til stóð að þau yrðu þingfest fyrir réttarhlé - það tókst ekki og aðeins tvö eru því komin inn í dómskerfið. Annað er vegna bílasamnings einstaklings við Lýsingu en hitt er um 300 milljóna króna fyrrverandi gengislán fyrirtækis hjá Arion banka.

Þessi mál eiga meðal annars að skera úr um það hvenær seðlabankavextir eiga að reiknast á ólögleg lán, til dæmis hvort það er frá því að lánin voru dæmd ólögleg í júní 2010 eða þegar Árna Pálslögin voru sett í desember sama ár. Sömuleiðis hvort skuldarar sem nýttu sér ýmis úrræði, eins og frystingar, falli undir fordæmi Hæstaréttar.

Æði margir af þeim tugþúsundum fjölskyldna og fyrirtækja sem tóku gengislán, eru eflaust orðnir langeygir eftir niðurstöðu í sínum skuldamálum. En hætt er við að Ásta Sigrún Helgadóttir, umboðsmaður skuldara, hafi verið heldur bjartsýn í vor þegar hún kvaðst vona að fyrstu dómar kæmu í haust.