Jo Nesbø áritaði óvænt í Máli & menningu

„Þetta var óneitanlega mjög skemmtileg og óvænt uppákoma hér í búðinni," segir Kristján Freyr Halldórsson, verslunarstjóri í bókabúð Máls og menningar við Laugaveg en þangað kom norski metsöluhöfundurinn Jo Nesbø í óvænta heimsókn um helgina.

Jo Nesbø rak inn nefið í Mál og menningu á laugardagskvöldið. Afgreiðslustúlkunum á vakt grunaði ekki að þarna væri sjálfur höfundurinn á ferðinni en tóku eftir því að Nesbø gekk brosandi um verslunina og virti íslensku deildina fyrir sér. „Hann kom til þeirra áður en hann gekk út, kynnti sig og þakkaði fyrir hversu vel bókum hans væru gerð skil í búðinni. Því næst sagðist hann hafa áritað nokkur eintök," segir Kristján, sem hafði strax samband við forlag Nesbø hér á landi, Uppheima, en þar könnuðust menn ekki við ferðir höfundarins hér á landi og töldu því ólíklegt að um Nesbø væri að ræða.

„Ég setti mig því í rannsóknarlögreglugírinn til að ganga úr skugga um hver í ósköpunum hefði krotað í bækurnar undir fölsku flaggi. Eftir að hafa skoðað öryggismyndavélar og borið áritunina í bókunum saman við mynd af áritun Nesbø sem ég fann á netinu, erum við ekki í vafa um að þetta var hinn eini sanni Nesbø," segir Kristján sem hefur stillt árituðu eintökunum sérstaklega upp í búðinni á meðan forlagið reynir að hafa uppi á metsöluhöfundinum. „Þetta er skemmtilega saga en starfsmenn mínir höfðu orð á því að Nesbø hefði verið hinn viðkunnanlegasti og mjög svo alþýðulegur náungi."

- áp