Kemur ríðandi á tónleikastað

"Hugmyndin er að koma ríðandi frá Reykjavík og ætlar Erpur Eyvindarson, Vestfirðingurinn knái, að taka á móti okkur við bæjarmörkin og fylgja okkur síðasta spölinn. Hann hyggst leiða mig í sannleikann um að Kópavogur sé alvöru borg og ég vona bara að það gangi upp hjá honum," segir söngvarinn Helgi Björnsson um fyrirhugaða tónleika sína og Reiðmanna vindanna í Salnum á laugardag.

Helgi hyggst koma ríðandi til tónleikastaðarins og segist hann hafa fengið lánaða hesta undir Reiðmennina einnig. Hestarnir munu svo bíða fyrir utan húsið á meðan á tónleikunum stendur. "Hestasveinar munu sjá um reiðskjótana á meðan," segir Helgi sem kemur ríðandi á hesti sínum, Dagfara.

Söngvarinn vinsæli hefur verið önnum kafinn síðustu mánuði og lék síðast í mynd Benedikts Erlingssonar, Hross. Hann segir verkefnið hafa verið stórskemmtilegt og hefur mikla trú á myndinni. "Ég held að þetta verði snilldarverk enda er handritið ærlega skemmtilegt."

Næst mun Helgi leika í nýrri kvikmynd leikstjórans Hafsteins Gunnars Sigurðssonar, Kalt vor, og hefjast tökur á myndinni á Flateyri næsta vor. "Ég fór líka með nokkuð stórt hlutverk í kvikmyndinni XL og sjónvarpsþáttunum Pressu, þannig að það er ýmislegt í gangi."

Tónleikar Helga og Reiðmanna vindanna hefjast klukkan 19 og hægt er að nálgast miða á Midi.is.

- sm