Reese selur búgarðinn á milljarð

Leikkonan Reese Witherspoon er búin að setja búgarð sinn í Ojai í Kaliforníu á sölu og biður um tíu milljón dollara fyrir slotið, rúmlega milljarð króna.

Reese giftist manni sínum Jim Toth á búgarðinum í fyrra en núna er búgarðurinn hvað þekktastur fyrir að hýsa Twilight-hönkinn Robert Pattinson þegar upp komst um að kærasta hans, Kristen Stewart, hafði haldið framhjá honum með leikstjóranum Rupert Sanders.

Reese og Jim eiga von á sínu fyrsta barni saman en Reese á tvö börn með fyrrverandi eiginmanni sínum, leikaranum Ryan Phillippe. Fjölskyldan hefur komið sér vel fyrir á búgarðinum en honum fylgir sjö ekru landsvæði. Á búgarðinum eru fjögur svefnherbergi í aðalhúsinu, hesthús, þrjú gestahús og sundlaug. Nóg af dýrum eru á búgarðinum, til dæmis asnar, hestar, svín og hundar.

Til gamans má geta að Robert er líka að selja sitt heimili í Los Feliz sem hann deildi með Kristen þegar allt lék í lyndi.