Skotin fyrir að gagnrýna

Skólavagn fullur af börnum var í þann mund að leggja af stað frá skólalóð í bænum Mingora í austanverðu Pakistan í gær þegar maður nokkur kom að bílnum og spurði eftir stúlku, sem heitir Malala Yousoufzai. Önnur stúlka benti á hana, en þá dró maðurinn upp byssu og skaut þær báðar.

Malala fékk skot í bæði háls og höfuð, en er ekki sögð lífshættulega særð. Talið er að hin stúlkan muni einnig ná sér. Þær eru báðar á sjúkrahúsi.

Þótt Malala sé aðeins fjórtán ára gömul er hún vel þekkt í Pakistan fyrir baráttu sína fyrir menntun stúlkna. Hún er einnig þekkt fyrir að tala opinskátt um voðaverk talibana. Í fyrra var hún tilnefnd til alþjóðlegra friðarverðlauna barna.

Árásarmaðurinn var talibani, en talibanahreyfingin er mjög andsnúin því að stúlkur fái menntun. Talibanahreyfingin hefur lýst yfir ábyrgð sinni á árásinni, og segir að barátta Malala hafi verið ósiðleg.

„Þetta var nýr kafli í ósiðsemi, og við verðum að ljúka þessum kafla,“ sagði Ahsanullah Ahsan, talsmaður talibanahreyfingarinnar, í símaviðtali við fréttastofuna AP. „Við gerðum þessa árás.“

Talibanar hafa áður hótað henni og fjölskyldu hennar.

Malala var aðeins ellefu ára gömul þegar hún byrjaði að blogga undir dulnefni fyrir BBC á tungumáli sínu, sem er urdu. Á blogginu skrifaði hún um það hvernig er að búa við hernám talibana, sem réðu lögum og lofum á heimaslóðum hennar í Swat-dalnum.

Eftir að talibanar voru svo reknir úr Swat-dalnum árið 2009 fór hún að tala opinskátt undir eigin nafni um talibanahreyfinguna og um nauðsyn menntunar fyrir stúlkur.

Á síðasta ári tók hún þátt í málþingi barna á vegum UNICEF í Swat-dalnum og talaði þá um mikilvægi þess að börn létu rödd sína heyrast.

Kamila Hayat hjá Mannréttindanefnd Pakistans hrósaði Malala fyrir að standa upp í hárinu á ofbeldismönnunum og senda þau skilaboð til umheimsins að pakistanskar stúlkur hafi hugrekki til að berjast fyrir réttindum sínum.

Hún sagðist samt óttast að árásin verði til þess að foreldrar annarra barna muni koma í veg fyrir að þau segi hug sinn.

„Þetta eru öfl sem vilja fara með okkur aftur til myrku aldanna,“ segir Hayat.