Kúreki norðursins fær viðurkenningar

„Þetta kemur mér verulega mikið á óvart því mér hefði aldrei nokkurn tíma dottið þetta í hug,“ segir tónlistarmaðurinn Hallbjörn Hjartarson, kúreki norðursins og konungurinn í Kántrýbæ. Sendiráð Bandaríkjanna á Íslandi og bandarísku samtökin Country Music Association hafa ákveðið að veita Hallbirni viðurkenningu fyrir að koma kántrýtónlist á framfæri á Íslandi og fyrir framlag hans til kántrýtónlistar. Afhendingin fer fram í Kántrýbæ á Skagaströnd næstkomandi þriðjudag.

Sendiherra Bandaríkjanna, Luis E. Arreaga, veitir Hallbirni viðurkenningu frá Country Music Association og einnig viðurkenningu frá sendiráðinu, en í báðum tilfellum er um að ræða staðfestingu á miklu og góðu framlagi tónlistarmannsins til kántrýtónlistar á Íslandi. „Með eldmóði sínum og sköpunargáfu hefur Hallbjörn sameinað bandarískan tónlistarstíl íslenskri menningu og skapað einstaka tegund af íslenskri kántrýtónlist,“ segir í viðurkenningu sendiráðsins.

„Ég er ákaflega stoltur og þakklátur fyrir þennan skilning sem mér er sýndur á mikilvægi þess að kynna kántrýtónlistina á Íslandi,“ segir Hallbjörn, sem á ferlinum gaf út fjöldann allan af kántrýplötum. Hann kveðst hættur tónlistarsköpun en starfrækir enn útvarpsstöðina Útvarp Kántrýbæ sem fagnar tuttugu ára afmæli sínu þann 14. nóvember næstkomandi. „Ég hef ekki hugsað mér að halda sérstaklega upp á afmælið en ég hlakka til að veita þessum viðurkenningum móttöku,“ segir Hallbjörn.-kg