Lára sýnir Judy Garland

Leikkonan Lára Sveinsdóttir verður með Judy Garland-sýningu í Leikhúskjallaranum á morgun, sunnudag. Lára gaf fyrir skömmu út plötuna Judy Garland Kabarett sem er afsprengi sýningar sem var haldin í Þjóðleikhúskjallaranum síðasta vetur. Þar söng Lára þekktustu lög Garland ásamt því að bregða sér í nokkur hlutverk og segja sögu hennar. Garland var ein frægasta söng- og leikkona síðustu aldar. Hún hóf feril sinn aðeins tveggja og hálfs árs gömul. Hún lék í fjölda kvikmynda, kom fram í sjónvarpsþáttum og á tónleikum og sendi frá sér plötur.