SJP selur lúxusíbúðina í New York

Sex and the City-pæjan Sarah Jessica Parker og eiginmaður hennar, leikarinn Matthew Broderick, eru búin að setja íbúðina sína í Greenwich Village-hverfinu í New York á sölu. Ásett verð? 25 milljónir dollara, rétt rúmlega þrír milljarðar króna.

Turtildúfurnar, sem eiga þrjú börn – James Wilkie sem er næstum tíu ára og þriggja ára tvíburana Marion og Tabithu, þurfa samt ekki að hafa áhyggjur af því að pakka. Þau hafa átt heimili á Charles-stræti lengi og keyptu íbúðina í Greenwich Village í fyrra. Þau hafa samt aldrei flutt inn í þá síðarnefndu.

Í íbúðinni eru sex svefnherbergi og fimm baðherbergi en íbúðin er rúmlega 630 fermetrar. Henni fylgir fallegur bakgarður og hágæða öryggiskerfi.