Newcastle í litlum vandræðum með Liverpool | Pepe Reina sá rautt

Það gengur ekkert né rekur hjá Liverpool þessa daganna í ensku úrvalsdeildinni en liðið tapaði illa fyrir Newcastle, 2-0, á St James' Park. Liverpool hefur aðeins fengið átta stig í deildinni á árinu en Wolves er eina liðið sem hefur fengið færri stig árið 2012.

Newcastle var sterkari aðilinn í fyrri hálfleiknum en Liverpool átti samt sem áður ágæta spretti. Eftir tæplega tíu mínútna leik komst Andy Carrol, leikmaður Liverpool, einn í gegn, lék á Krul í marki Newcastle og átti í raun aðeins eftir að setja boltann í autt markið.

Carrol ákvað þá að láta sig falla niður til að fiska vítaspyrnu. Það eina sem Carrol uppskar með því var gult spjald. Fyrsta mark leiksins kom tíu mínútum síðar þegar Papiss Cissé skoraði laglegt mark með skalla.

Mjög umdeilt atvik átti sér stað í fyrri hálfleiknum þegar Danny Simpson, leikmaður Newcastle, varði skot frá Liverpool á marklínu með hendinni, en dómarinn sá ekki atvikið og lét leikinn halda áfram. Réttilega hefði Simpson átt að fá rautt spjald og Liverpool vítaspyrnu. Staðan var 1-0 í hálfleik.

Síðari hálfleikurinn var ekki eins fjörugur til að byrja með og voru liðin lengi að finna taktinn eftir leikhlé. Þegar um fimmtán mínútu voru liðnar af síðari hálfleiknum náðu heimamenn að sundurspila vörn Liverpool og aftur var það Papiss Cissé sem skoraði fyrir heimamenn.

Eftir markið brotnaði leikur Liverpool alveg saman og gekk ekkert upp. Kenny Dalglish, knattspyrnustjóri Liverpool, gerði þá þrjár breytingar á liðinu en þær skiluðu litlu. Þegar stutt var eftir af leiknum fékk Pepe Reina, markvörður Liverpool, rautt spjald fyrir að skalla James Perch.

Liverpool var þá búið með allar sínar skiptingar og því þurfti José Enrique að fara í markið hjá liðinu síðustu mínútur leiksins. Newcastle er í 6. sæti deildarinnar með 53 stig, aðeins tveimur stigum á eftir Tottenham sem er í 4. sætinu en það gefur þátttöku rétt í forkeppni Meistaradeildar Evrópu. Liverpool er í því áttunda með 42 stig.

Staðan í ensku úrvalsdeildinni.