Snjóbrettamaður með 4 fyrirtæki í rekstri

Halldór Helgason hafnaði í 5 sæti á Freestyle.ch mótinu í Sviss um síðustu helgi. Þetta er fyrsta mót Halldórs eftir meiðsli sem hann varð fyrir á heimsmeistaramótinu í Osló í janúar síðastliðnum. Halldór sigraði Vetrar X leikana árið 2010 og tók ferill hans stórt stökk eftir þann sigur. Hann og bróðir hans, Eiríkur Helgason, reka í dag 4 fyrirtæki sem framleiða snjóbrettavörur og þar að auki hlýtur Halldór auglýsingastyrki frá hinum ýmsu fyrirtækjum þess á meðal íþróttarisanum Nike.

Halldór segist ekki æfa með þjálfara því þannig finnist honum sportið verða of alvarlegt. „Ég fíla þjálfara ekki neitt, út af því mér finnst eins og þetta sé að verða aðeins of alvarlegt í snjóbrettaheiminum núna. Það er fólk sem þarf að mæta á æfingu og er alltaf með þjálfara en það myndi eyðileggja snjóbrettaáhugann fyrir mér. Æfingar og allt þetta dót - ég fíla það ekki neitt," segir Halldór í samtali við Ragnhildi Steinunni Jónsdóttur sem ræddi við Halldór fyrir Ísþjóðina, þátt sem sýndur verður á RÚV í kvöld. Halldór segist alls ekki líta á sig sem íþróttamann. Það sé hluti af hans lífsstíl að renna sér á snjóbretti.