Benitez orðaður við Chelsea | hitnar undir Villas-Boas

Nafn Spánverjans Rafa Benitez hefur skotið upp á yfirborðið í enskum fjölmiðlum og segir Daily Mail að Benitez gæti tekið við liði Chelsea eftir þetta keppnistímabil. Það hefur nánast ekkert gengið upp hjá hinum unga Andre Villas-Boas frá Portúgal frá því hann tók við liði Chelsea. Og eigandi liðsins, Rússinn Roman Abramovich er ósáttur við gengi liðsins.

Það verður vel fylgst með Villas-Boas í kvöld þegar Chelsea mætir Napólí á Ítalíu í 16-liða úrslitum Meistaradeildarinnar. Napólí er til alls líklegt en liðið vann Manchester City 2-1 á heimavelli sínum í riðlakeppninni og skildi Man City eftir í þriðja sæti riðilsins.

Chelsea er í fimmta sæti ensku úrvalsdeildarinnar og þarf að leik aftur við Birmingham í ensku bikarkeppninni eftir 1-1 jafntefli á útivelli í 16-liða úrslitum keppninnar.

Benitez landaði titlum á meðan hann var knattspyrnustjóri Liverpool en hinn 51 árs gamli þjálfari hefur ekki verið í starfi frá því hann hætti hjá Inter á Ítalíu árið 2010.