Vann sitt fyrsta Ólympíugull á sínum sjöttu leikum

Hvít-Rússinn Sergei Martynov vann gull í skotkeppni á Ólympíuleikunum í dag og það er óhætt að segja að þessi 44 ára gamli skotmaður sé búinn að bíða lengi eftir fyrsta Ólympíugullinu sínu.

Sergei Martynov var nefnilega að keppa á sínum sjöttu leikum og hafði hingað til unnið tvö verðlaun, brons í Sydney 2000 og brons í Aþenu 2004. Martynov náði þó aðeins áttunda sætinu í þessari grein fyrir fjórum árum.

Öll þessi verðlaun Martynov hafa komið í keppni í 50 metra liggjandi riffli en hann hefur fengið viðurnefnið maðurinn sem brosir aldrei.

Martynov fékk 600 stig eða fullt hús í undankeppninni og setti að lokum nýtt heimsmet með því að ná í alls 705,5 stig. Hann burstaði hreinlega keppnina en í öðru sæti varð Belginn Lionel Cox. Slóveninn Rajmond Debevec fékk síðan bronsið.

Martynov keppti fyrst á leikunum í Seoul árið 1988 þá tvítugur. Hann missti af leikunum í Barcelona fjórum árum síðar en hefur verið með á öllum Ólympíuleikum síðan.