Keppa við Jay Z og Kanye West

„Það er mikill heiður að keppa við svona stór nöfn í tónlistarbransanum," segir Atli Viðar Þorsteinsson framleiðandi. Myndband hans og Helga Jóhannssonar leikstjóra við lagið What Are You Waiting for með Diktu, sem var frumsýnt hér á Vísi í ágúst, keppir í tónlistarmyndbandakeppninni Protoclip.

Keppnin er alþjóðleg og haldin í Frakklandi dagana 30. nóvember og 1. desember næstkomandi. Önnur framlög í keppninni eru meðal annars myndband Jay Z og Kanye West við lagið No Church in The Wild og myndband sveitarinnar Foster the People við lagið Houdini. „Það eru mörg stór nöfn í þessari keppni og mjög gaman að hafa komist að," segir Atli en þeir félagar sendu myndbandið sjálfir inn.

„Maður leitar út fyrir landsteinana til að koma verkum sínum á framfæri. Tónlistarmyndbönd verða gjarnan út undan hérna heima og er illa sinnt að mínu mati."

Leikstjórinn Michel Gondry er guðfaðir keppninnar, en hann hefur meðal annars gert tónlistarmyndbönd fyrir Björk, Rolling Stones og Paul McCartney.

Atli Viðar og Helgi leita nú leiða til að komast út á sjálfa verðlaunaafhendinguna enda kjörið tækifæri til að hitta kollega sína í myndbandagerð. Kosning í keppninni fer fram á netinu en hér á heimasíðu Protoclip er hægt að sjá alla keppendur og kjósa.

„Við hvetjum að sjálfsögðu alla Íslendinga að kjósa landa sína," segir Atli.

Hægt er að horfa á Diktumyndband þeirra félaga hér fyrir ofan. Fyrir neðan er síðan hægt að sjá nokkur myndbandanna sem þeir keppa við.

Jay-Z og Kanye West - No Church In The Wild:

Foster The People - Houdini:

Skrillex & Damian "Jr. Gong" Marley - Make It Bun Dem:

Major Lazer - Get Free:

Diplo - Set It Off:

Insane Clown Posse - Chris Benoit: