Fágætt viðtal við frænda leiðtoga Norður-Kóreu

Frændi leiðtoga Kim Jong-Un, leiðtoga Norður-Kóreu, kom fram í viðtali í Bosníu, þar sem hann stundar nám þessa stundina. Frændinn, sem heitir Kim Han-sol er sautján ára gamall og ólst meira eða minna upp í Maká og Kína. Faðir hans, Kim Jong-nam er bróðir Kim Jong-il hins alræmda einræðisherra Norður-Kóreu, sem lést í desember á síðasta ári.

Kim Jong-nam hefði að óbreyttu átt að taka við sem leiðtogi Norður-kóreu, enda erfast völdin þar í landi. Talið er að Jong-nam hafi fallið í ónáð eftir að hann reyndi að smygla sér til Japans árið 2001 með fölsuðu vegabréfi. Þegar hann var spurður hvað hann vildi til Japans svaraði hann því til að hann vildi fara í Disney-garðinn. Japönsk sjónvarpsstöð hafði svo eftir honum að hann væri mótfallinn því að völdin gengu í erfðir. Líklega var það sem gerði útslagið.

Sonur hans, Kim Han-sol, er nútímalegur ungur maður samkvæmt viðtalinu sem BBC greinir frá. Þar útskýrir hann meðal annars að hann vilji mennta sig til þess að bæta stöðu landa sinna sem eigi stóra þátt í hjarta hans. Hann segir ennfremur að faðir sinn sé ekki pólitískur og því hafi það aldrei komið til greina að hann tæki við landinu.

Þá hefur hann aldrei hitt föðurbróður sinn né frænda sem nú ríkir í Norður-Kóreu, þó hann hafi fæðst í Pyongyang, höfuðborg Norður-Kóreu.

Um afa sinn, Kim Il-sung segir Han-Sol að hann hafi aldrei hitt hann, en vonaðist á tímabili að hann myndi finna sig. Han-sol sagðist ekki einu sinni viss hvort Il-sung hafi nokkurntímann vitað af tilvist sinni.

Kim Han-sol segist svo að lokum vilja ganga í háskóla og sinna góðgerðastörfum. Ekki er ljóst hversvegna pilturinn gefur færi á sér í viðtali nú en hann komst fyrst í heimsfréttirnar á síðast ári þegar suður-kóreskir fjölmiðlar greindu frá Facebook-notkun hans. Reikningnum á samskiptasíðunni var lokað mjög snögglega eftir þann fréttaflutning.

Viðtalið er tekið af finnsku sjónvarpskonunni Elisabeth Rehn, fyrrverandi ráðherra í Finnlandi. Hægt er að horfa á fyrri hluta viðtalsins hér fyrir ofan. Athugið að viðtalið sjálft er á ensku þó inngangurinn sé á finnsku.