Lady Gaga ældi í miðju lagi - en missti ekki úr takti

Stórstjarnan Lady Gaga, sem mun veita friðarverðlaunum Yoko Ono og John Lennon móttöku á morgun, átti heldur erfiða helgi, en hún ældi fjórum sinnum á sviði þar sem hún var að spila fyrir aðdáendur sína í Barcelona á Spáni.

Daily Mail greinir frá þessu og birtir myndband þar sem hún sést ganga niður stiga, syngjandi og dansandi - og ælandi. Poppstjarnan nær þó að leyna veikindunum því hún missir ekki úr takti, hvorki í söng né dansi, þrátt fyrir að hún þarf að æla fjórum sinnum á hálfri mínútu. Það var aftur á móti árvökull gestur vopnaður myndavél sem náði að festa atvikið á mynd.

Stjarnan gerir reyndar grín að þessu sjálf á Twitter-síðu sinni og segist hafa vonast til þess að enginn hafi séð hana æla. Hún virðist þó hafa húmor fyrir uppákomunni og hlekkjar sjálf á myndbandið.

Raunar er Gaga ekki eina stjarnan sem hefur ælt á sviðinu undanfarið, því ungstirnið Justin Bieber lét einnig flakka á tónleikum um daginn.

Eins og kunnugt er mun dívan mæta á klakann til þess að taka á móti friðarverðlaunum Ono og Lennons. Nokkur leynd er í kringum komu Lady Gaga sem mun taka við verðlaununum í Hörpu á morgun.